نوشہرہ، 31 اکتوبر: ضلع نوشہرہ میں چراٹ روڈ پر مسلح افراد کی فائرنگ سے اسسٹنٹ کمشنر مانسہرہ (اوگی) عادل وسیم شدید زخمی ہوگئے۔ نامعلوم حملہ آوروں نے جلالوزئی تھانے کی حدود میں ان کی سرکاری گاڑی کو نشانہ بنایا۔
ابتدائی اطلاعات کے مطابق عادل وسیم کا تعلق نوشہرہ کے گاؤں صالح خانہ سے ہے اور وہ اپنے آبائی گاؤں میں تعزیت اور فاتحہ خوانی کے لیے گئے ہوئے تھے۔ واپسی پر پشاور جاتے ہوئے چراٹ روڈ پر پناہ کوٹ (پناکوٹ) کے قریب نامعلوم مسلح افراد نے ان کی سرکاری گاڑی پر گھات لگا کر اندھا دھند فائرنگ کردی۔
فائرنگ کے نتیجے میں اسسٹنٹ کمشنر شدید زخمی ہوگئے۔ ریسکیو 1122 کی ٹیم فوری طور پر جائے وقوعہ پر پہنچ گئی، جہاں انہیں ابتدائی طبی امداد فراہم کرنے کے بعد مزید علاج کے لیے پشاور کے ہسپتال منتقل کردیا گیا۔
متعلقہ پوسٹس
واقعے کی اطلاع ملتے ہی ایس ایچ او جلالوزئی حنیف خان پولیس کی بھاری نفری کے ہمراہ جائے وقوعہ پر پہنچ گئے۔ پولیس نے حملہ آوروں کی تلاش اور شواہد جمع کرنے کے لیے گردونواح میں سرچ آپریشن شروع کردیا۔
تاحال حملہ آوروں کی شناخت اور واقعے کے محرکات سامنے نہیں آسکے، جبکہ مزید تحقیقات جاری ہیں۔
دریں اثنا، خیبرپختونخوا کے گورنر کی مشیر برائے اطلاعات ثمر ہارون بلور نے اسسٹنٹ کمشنر پر حملے پر تشویش کا اظہار کیا۔ انہوں نے زخمی افسر کی جلد صحت یابی کے لیے دعا کرتے ہوئے واقعے کی شفاف تحقیقات اور ذمہ دار عناصر کی فوری گرفتاری کا مطالبہ کیا۔
واقعے کے بعد سرکاری افسران کے تحفظ اور علاقے میں امن و امان کی صورتحال کے حوالے سے سیکیورٹی اقدامات کی اہمیت ایک بار پھر اجاگر ہوئی ہے۔